CEBU, Philippines - Upat ka mga gidudahang kawatang magsakay og taxi nadakpan sa gipahigayong checkpoint sa sakop sa Mambaling Police Station kagahapon sa kaadlawon.
Ang upat giilang sila si Reynald Zamora 18, Ryan Tan, Randy Duarte ug Margelo Baraclan nga pulos taga Ward 4 lungsod sa Minglanilla.
Si SPO4 Elden Miñoza sa Mambaling Police Station nga gikahinabi sa Banat News miingon nga sila si Insp. Henry Oguia ug mga kaubanan nag- checkpoint sa mga dalan Kinalumsan St., Spolarium St. ug C. Padilla ning dakbayan sa Sugbu.
Dihang gisusi ang sakay sa taxi nagduda ang kapolisan sa mga gamit nga gikarga niini nga usa ka LG Component, cellphone, mga pitaka ug mga personal nga gamit sa biktimang si Reynaldo Brojan 42, taga Deca Homes barangay Tunghaan, Minglanilla.
Matud pa ni SPO4 Miñoza nga nangalyas og pangalan ang upat apan human sukit-sukita mitug-an sila nga mga taga Minglanilla hinungdan nga ilang gitawgan ang kapulisan sa Minglanilla.
Diha na nila mahibaw-ing dunay gikawatan sa maong lungsod ug dihang gisusi ni Brojan ang mga butang positibo niya kining giila nga iyaha nga gikawat bag-uhay pa lang nianang pagka-alas 3 sa kaadlawon.
Si PO3 Allen Garciano sa Minglanilla Police Station nga gikahinabi sa Banat News nagkanayon nga miagi sa kural ang mga suspetsado ug giguba ang pultahan sa kusina. – BANAT NEWS