CEBU, Philippines - Gipauwanan og mga bato ang usa ka isnatser nga misulod og balay human kini tabangi og gukod sa mga estambay nga naalarma sa dihang misinggit sa pagpangayog panabang ang usa ka tigulang babaye nga gilabnihan sa iyang pitaka.
Ang suspetsado giila nga mao si Ryan Perez Masyon, 22, ulitawo, lumad nga taga Isabel, Leyte ug walay tataw nga pinuy-anan sa dakbayan sa Mandaue.
Si PO1 Camelo Baya sa kapolisan sa Presinto 1 nga nahinabi sa Banat News miingon nga gilabni sa suspetsado ang pitaka ni Josephina Gonzaga, 68, nga nagpuyo sa maong dapit.
Nakasinggit sa pagpangayo’g panabang si Gonzaga ug ang mga estambay nga kalalakin-an sa maong lugar dali usab nga nagtinabangay sa paggukod niini.
Gisinggitan sa naggukod nga mga lalaki sa paggawas og dungan usab ang pagpauwan og bato nga maoy nakaaghat sa suspetsado sa pag-ambak sa koral nga semento nga gibutangan og talinis nga mga bato ug bildo ang ibabaw hinungdan sa pagkalaplap sa lapalapa ug kalawasan niini.
Si PO1 Baya miingon nga gitabangan na unta sa pagkulata si Masyon sa masuk-anong mga estambay sa maong dapit apan dali kini nilang napakgang ug ilang gidala sa Mandaue City District Hospital. - Romeo T. Limpangog (BANAT NEWS)