CEBU, Philippines - Dakbayan sa Talisay motagana og P500 mil nga salapi alang sa paghinumdum sa makasaysayanong ika-64th Landing Celebration karong Marso 26, 2009.
Si Konsehal Shirley Belleza kinsa tsirman sa Committee on Tourism sa konseho sa siyudad mibutyag kagahapon nga mangayo sila og P300 mil nga budget gikan sa kagamhanan sa probinsiya sa Sugbo nga gamiton alang sa mga ipahigayong kalihukan sa nahisgutang selebrasyon.
Matud ni Belleza nga naandan nga ihatag nga ayuda sa probinsiya sa Sugbo ngadto sa Talisay alang sa maong kasaulogan P200 mil apan karon P300 mil ang gipangayo sa dakbayan ug gilauman nila nga mohatag sa maong kandidad ang probinsiya sa Sugbo.
Naandan usab nga ang Talisay ang mopagawas gikan sa ilang panudlanan og P200 mil nga ipuno sa gihatag sa probinsiya sa Sugbo.
Si Belleza nagkanayon nga matag tuig gihimo nilang bongga ang pagpahigayon sa selebrasyon sa landing.
Niining tuiga ang lugar diin gitukod ang landing marker diha sa barangay Poblacion ang ideklara na nga Landing Shrine nga karon pabutangan na og mga estatwang sundawo diha sa dagat.
Si Belleza midugang nga si Tourism Secretary Ace Durano maoy usa sa pinasidunggang dinapit sa pagpahigayon sa nahisgutang kasaulogan.
Si Kongresista Eduardo Gullas sa unang distrito sa Sugbo naninguha nga mapanindot ang nahisgutang landing marker sa siyudad.
Sa laing bahin, sa Marso 22, 2009 pormal na nga buksan ang Lagundi Reef alang sa mga turistang gustong mo-dive niini isip kabahin sa selebrasyon, ang maong ‘takot’ kon reef dunay mga makitang artifacts nga gituohang gikan pa sa ikaduhang gubat. Ug karon gideklarar nang fish sanctuary. – BANAT NEWS