CEBU, Philippines - Ang Department sa Agriculture Regional Field Unit 7 (DA RFU 7) mopahigayon og libre nga seminar sa pagpamuhi og baboy ugma sa alas 9:00 sa buntag sa conference room sa DA sa dalan M. Velez, dakbayan sa Sugbo.
Si Oliver Patlingrao sa DA RFU 7 Livestock Division nagkanayon nga ang maong seminar gitumong aron sa paghatag og tukmang kasayoran ngadto sa mga nagsugod pa sa pagbaboyan ug niadtong gustong mamuhi og baboy isip usa ka panginabuhian.
.Ang mga hisgotanan sa maong seminar naglakip sa hustong pagpakaon, pagkontrolar ug pagsumpo sa mga sakit ug pagpadunot sa hugaw aron mahimo kining abuno pinaagi sa vermicomposting.
Midugang si Patlingrao nga sa maong seminar may libre nga mga basahon nga ipanghatag apan gihangyo ang mga mangapil sa pagdala sa ilang paniudto.
Alang sa dugang kasayoran mahimong tawgon si Patlingrao, si Ann o Teddy sa mga telepono 2538357 ug 2557749. - Romeo T. Limpangog (BANAT NEWS)