CEBU, Philippines - Usa ka bombero ang naangol sa sunog nga miugdaw sa upat ka mga establisamento kagahapon sa hapon didto sa dalan Pelaez, sa Barangay Kalubihan ning dakbayan sa Sugbu nga matud pa naggumikan sa kandila.
Ang bomberong naangol mao si FO1 Rodelio Labulos, kinsa natusok sa bildo nga milapos sa iyang sapatos.
Gibana-banang mikabat og P550 mil ang kadaot sa maong sunog nga nakontrolar sulod sa 10 minutos ug gideklarar nga 2nd alarm sa taga Cebu City Fire Department busa gitampunsisokan kini sa dul-an 20 ka trak sa bombero busa dali rang napawong.
Ang sunog nagsugod sa Angel’s Carenderia nga gipanag-iya nila ni Ging-Ging Go ug Angelina Tian nga mikatap sa kasikbit nga mga establisamento sama sa E.G. De Guzman nga gipanag-iya usab ni Ernesto de Guzman ug sa duha ka boarding house nga gipanag-iya ni Antonio Lao.
Matud pa sa tindera sa maong karenderia, kinsa wala magpaila, nga kandila ang hinungdan sa maong sunog.
Giingong gibiyaan ang maong kandila sa kwarto sa iyang amo nga dinagkutan o nasiga kay nakalimtan pagpawong sa iyang amo.
Dugang pa niya nga nakagamit og kandila ang iyang amo tungod kay nag-brownout man kini ug didto nagduda siya nga natumba ang kandila ug nakasilab kini sa mga butang nga dali rang masunog, ug didto nagsugod na ang kayo nga miugdaw dayon sa mga biste sa iyang amo.
Apan gihimakak ni Angelina Tian, usa sa mga tag-iya sa maong karenderia kinsa lig-on kaayo sa iyang pamahayag nga wala siya mogamit og kandila.
Matud pa ni Tian nga natingala siya kun nganong kalit lang nga misilaob ang ilang karenderia niadtong higayona.
Ang imbestigador sa Fire Department nga si FO3 Antonio Gonzales mibutyag sa Banat News nga naabtan na nila ang maong sunog nga dako na kaayo hinungdan nga ila kining gideklarar nga 2nd alarm.
Si Gonzales nagkanayon nga ila pang ipadayon ang imbistigasyon sa maong sunog aron sa pagsuta sa tinuoray nga hinungdan niini. - BANAT NEWS