CEBU, Philippines - Usa ang namatay ug usa ang naangol sa tulo ka mga batan-on nga gi-atngan ug gipamusil sa dalan samtang nagsakay og motorsiklo paingon sa ilang pagpamauli didto sa mingaw nga lugar sa barangay Matab-ang siyudad sa Toledo niadtong Biyernes sa alas 5 sa hapon.
Ang biktima nga namatay human makaangkon og samad pinusilan sa bukobuko nga milapos sa dughan mao si Jerrymy Fernandez, hingkod ang panuigon ug nag-angkas sa motorsiklo nga gimaneho sa usa lang ka gihinganlan og Micheal ug ang ikatulo nga angkas mao si Marciano Gabito Fajardo, 22, ulitawo pulos mga molupyo sa barangay Abucayan, lungsod sa Balamban.
Matud ni PO2 Dante Hilo sa Toledo City Police Station sa dihang nahinabi sa Banat News nga ang mga biktima nag-angkasay sa motorsiklo gikan nga nanuroy ug paingon na untang mopauli sa ilang lugar.
Apan paghiabot nila sa nahisgutang lugar kalit lang silang nakadungog og boto sa armas ug paglabay sa pipila ka gutlo natagak ang angkas nga si Fernandez nga naigo sa bukobuko nga milapos sa dughan nga ang bala miigo pa gyud sa tuo nga bukton sa ikaduhang angkas nga si Fajardo.
Nangayo og panabang ang mga biktima sa mga estambay sa maong lugar ug gidala dayon sila sa Balamban District Hospital apan gi-refer usab dayun sa tambalanan dinhi sa dakbayan sa Sugbo.
Apan si Fernandez namatay gyud samtang gipaubos sa operasyon sulod sa Vicente Sotto Memorial Medical Center nianang pagka alas 10 sa gabii sa maong adlaw. - Darrel A. Carumba (BANAT NEWS)