CEBU, Philippines - Usa ka kapitan sa barangay mireklamo tungod kay may usa ka seaman nga nagpapolis- polis ug nanghulga kaniya atol sa usa ka vehicular accident nga nahitabo didto sa Poblacion Ward-3 sa lungsod sa Minglanilla niadtong miaging hapon.
Si Kapitan Edward Caumeran sa barangay Poblacion, Barili mibahad nga iya gyung ikiha si Antonio Mañacap, hingkod, nga taga 807 Saint Peter Village, sa Tunghaan, Minglanilla, kinsa usa ka seaman apan nagpaila nga usa ka polis.
Si SPO4 Remegio Elacion sa Minglanilla Police Station mibutyag sa Banat News nga si kapitan Caumeran gikan sa syudad sa Sugbo nga nagsakay sa iyang Toyota Van paingon sa Barili dihang pag-abot niya sa Poblacion Ward 3 nakasaghid kini og dumptruck .
Samtang nagkalalis siya ug ang drayber sa dump truck, miabot ang suspek ug kalit lang mibunot sa gitangkil nga .45 kalibreng armas de fuego niini dungan sa pagpailang usa siya ka polis.
Tungod kay gihulga siya niini, si Caumeran mibahad nga iya gyud kining ikiha sa hukmanan kay dili diay tinuod nga polis apan nagpapolis-polis lang. – BANAT NEWS