CEBU, Philippines - Natuhab ang liog sa usa ka drayber sa traysikad dihang giduslak kini sa wala hiilhing kriminal didto sa Sitio Huyong-huyong, barangay Alaska- Mambaling ning dakbayan sa miaging gabii.
Ang biktima mao si Sordonio Tampus, 33, taga Sitio Ipi-Ipil sa nahisgutang barangay ug usa ka drayber sa traysikad .
Sumala sa kapolisan, namasahero niadtong higayona ang biktima dihang gikalit lang og bunlot sa kriminal ang iyang buhok ug sa walay pupangutana gihansak ang kutsilyo niini sa liog sa biktima.
Human sa maong pagpanunggab, kalma ra kaayong misibat ang kriminal ug wala gayud kini hiilhi sa biktima.
Hinuon ang biktima bisan kun nabuslot na ang liog niini sa dinunggaban, nakapauli pa sa ilaha ug nangayo og panabang sa iyang igsoon.
Matud pa sa kapolisan nga ang biktima kinsa walay record sa unsa mang krimen sa ilang lugar gituohang nabiktima lang sa paregla.
Gihatod dayon ngadto sa Cebu City Medical Center ang biktima samtang ang miluba niini gipangita pa sa kapolisan. - Lesley Caminade ug Orven Nayon