CEBU, Philippines - Dunay plano karong ipabalhin na ngadto sa PNP National Headquarters si Police Regional Office (PRO-7) Chief Supt. Ronald Roderos.
Kini maoy gipahibalo sa miduaw nga si Police Deputy Director General Ismael Rafanan ang Deputy Chief PNP for Administration kinsa maoy guest speaker sa PRO-7 18TH PNP Day Celebration kagahapong adlawa.
Buot sa kadagkoan sa PNP nga mabalhin ang heneral aron magamit usab ang kasinatian niini pagdala sa PRO-7 nga gihulagway nilang maayo ug kapanaminan.
Dugang pa niini, kini aron makuha ni Roderos ang ikaduhang “star” sa iyang abaga. Si Roderos sa pagkakaron isip regional police director matawag nga “One Star” general.
Apan si Roderos kung maoy pabut-on mas gustuhon niyang magpabilin dinhi sa Sugbu tungod kay dia na diri siya nagpuyo sa dugay’ng panahon ug mitawag na sa iyang kaugalingon nga usa ka Sugbuanon.
Dunay mga classmates ni Roderos sa Philippine Military Academy class 75 nga misugyot kaniyang pa-aplayon karong Marso 2 ning tuiga sa promosyon, wala hinuon motubag ang heneral kabahin niini.
Nasayran nga halos tanang kongresista dinhi sa rehiyon siete ang nipadayag sa ilang pagsuporta kang Roderos nga magpabilin kini isip hepe sa PRO-7 gumikan usab sa maayong performance. - Guam Logroño (BANAT NEWS)