CEBU – Nalandig sa tambalanan ang magtiayong Indians nga tigpautang human sila pamusila sa tulo ka wala mailhing mga lalaking nagmotor niadtong Biyernes sa hapon sa sitio Tangub, barangay Lagtang, dakbayan sa Talisay.
Ang mga biktima giilang sila si Baldev Singh, 35-anyos ug Rani Geeta Singh, 34, mga residente sa Southwinds Subdivision, barangay Cansojong sa nahisgutang siyudad.
Base sa imbestigasyon sa kapolisan, ang magtiayong Singh gikan naningil sa ilang mga kliyente ug paingon na untang mopauli dihang pag-abot sa dapit kalit silang gibabagan ug gitulis sa tulo.
Matud pa sa pamahayag sa duha, nakabantay na silang daan nga may usa ka kolor puwa nga Honda XRM nga may tulo ka tawong sakay nga nagsunod ug hinay-hinay nga nipaduol kanila.
Dihang nakatupad na kini kalit silang gipamusil niini hinungdan sa ilang pagkatumba, usa sa mga mamumuno ang mikanaog aron unta sila duolon ug tiwasan apan tungod sa buto-buto nanggawas ang mga tawo.
Hinungdan nga daling miangkas og balik ang maong lalaki ug nagdali ang tulo pagbiya sa dapit.
Ang mga biktima ang nakaangkon og mga samad pinusilan ug gipangdala sa Talisay City District Hospital apan tungod sa ilang kahimtang ang duha gibalhin ngadto sa usa ka pribadong tambalanan.
Bisan og walay nakuhang kwarta ug mga personal nga butang sa mga biktima usa sa gisusi ang motibo sa tulis.
Ang kapolisan ang naka-recover og upat ka kabhang sa bala sa kalibre .45 nga pistola diha sa crime scene. –BANAT NEWS