CEBU – Gibati og kaluoy si Cebu City Acting Vice Mayor Hilario Davide III ngadto kang Cebu City Police Office (CCPO) Director Sr. Supt. Patrocinio Comendador bahin sa paghingalan kanilang “bulay-og.”
Ang komentaryo migawas gumikan sa kadugay sa mga polis sa siyudad pagsulbad sa duha ka kaso sa dakbayan niadtong miaging buwan.
Kini mao ang pagbanhig-patay kang Assistant Cebu City Prosecutor Patrick Ian Osorio ug sa usa ka Iranian national nga nagtungha sa siyudad nga si Ashkan Aminian.
Ang acting vice mayor nga mao usab ang acting chairman sa Police Coordinating and Advisory Council (PCAC) nisimpatiya ngadto kang Comendador.
Kini dihang ang CCPO director nipakita sa iyang kahiubos atol sa ilang senemanang tigom sa PCAC kagahapon.
“I can understand sa feeling ni Comendador nga mura siya og nahiubos sa editorial ba kay naningkamot gud tingali sila nga madali pagsulbad ang kaso,” sumala ni Davide.
“But these are not easy cases, murder cases gud ni, so, people can’t expect nga madali-dali ni pagsulbad,” dugang pamahayag ni Davide.
Taliwa niini gisugyot gihapon ni Davide ngadto kang Comendador nga mo-assign og maayong mga imbestigador nga motutok sa nahisgutang mga kaso.
Nagkanayon hinuon ang acting vice mayor nga gisugilon kanila ni Comendador nga ang kapulisan duna nay gisunod nga mga lead sa maong duha ka murder cases. (Elly Bolonos) (BANAT NEWS)