Cebu - Usa ka police asset nga sakop sa Anti-Robbery Task Force (ARTAF) sa Cebu City Police Office nagtingkagol sa Mabolo Police Station human gidakop dihang giingong nagmaoy ug misulong sa barangay hall sa Mabolo niadtong Miyerkules sa gabii.
Ang dinakpan kinsa mag-atubang og kasong illegal possession of firearm giilang si Leo Caminade, 43, nagpuyo sa nahisgutang lugar human makuhai og usa ka paltik .38 revolver uban sa unom ka buhing bala.
Si Caminade nasikop ni PO2 Aron Piscadero sa Mabolo Police Station nga gi-detail sa barangay hall dihang hubog kini kaayong misulong ug nangita sa chief tanod nga si Janos Suralta.
Gikatahong nagwara-wara og armas ang maong asset hinungdan nga gisikop kini ni Piscadero human madisarmahi. Wala usab makapresentar si Caminade og papeles sa maong armas ug nigawas nga positibo kini sa bino human ipailawom sa liquor test.
Nasayran nga si Caminade ug Suralta duna nay personal nga panagbangi niadtong Sabado dihang wala tagda sa tanod ang iyang dinakpan. - Guam Logroño (BANAT NEWS)