Cebu - Gihangop ni Kongresista Eduardo Gullas ang lakang sa Department of Education (DepED) nga i-promote ang pagtudlo sa Spanish sa mga piniling tunghaan sa gobyerno unya sa Hunyo.
Ang representante sa unang distrito sa lalawigan sa Sugbu ug nanag-iya sa usa ka unibersidad sa lalawigan miingon nga positibo kining maong lakang aron dasigon ang mga tinun-an sa sekondarya nga makat-on sa pinulongang Kinatsila.
Kadaghanan karon nga mga gradwado sa kolehiyo nagkinahanglang mahimong hanite sa nagkalainlaing pinulongan sa gawas sa nasud aron dali rang makakita og trabaho sa ubang nasud.
Si Gullas kinsa maoy nangamahan sa balaodnon sa paggamit sa pinulongang Eninglis sa eskuylahan aron dali rang mahanite ang mga estudyante ning maong sinultihan.
Matud ni Gullas nga basta kamao mosulti og Eninglis segurado gyud nga dali rang makatrabaho sa gawas sama sa daghan na karong mga Pilipino nga nagdawatan og dagkong suweldo didto sa gawas.
Ang IBM Business Services Inc. Unit sa Armonk , New York nang- recruit karon og mga staff nga kamaong mosulti og Englis ug Spanish o bisan unsa nga klase sa pinulongan sama sa Japanese, Mandarin, Cantonese, French, German, Italian, Portuguese, Danish, ug Swedish or Dutch ug uban pa, matud pa sa kongresista. - Rey Pasaporte (BANAT NEWS)