Cebu - Gipahibalo sa Land Franchising and Regulatory Board (LTFRB) nga dakpon na sugod karong Lunes ang tanang mga mobiyahe nga taxi dinhi sa Central Visayas nga wala makapa-imprinta og 4-digit sequence numbering sa ilang buhatan.
Matud ni LTFRB-7 director Romulo Bernardez nga kutob na lang karong alas 5 sa hapon ang deadline nga ilang gihatag sa tanang taxi units nga makapa-verify sa ilang buhatan aron ma-record sa ilang data base ug maisyohan sa 4-digit sequence number.
Gibutyag ni Bernardez sa dihang nahinabi sa Banat News nga pagkakaron miabot na og 90 porsiyento gikan sa 6,137 ka mga taxi units dinhi sa Metro Cebu ang nahatagan na og sequence number.
Matud sa direktor unya sa Lunes sa buntag ihatag na nila sa Land Transportation Office (LTO-7) ang kopya sa ilang lista sa tanang mga taxi units nga nahatagan og 4-digit number aron mao kini ilang basehan sa pagpanakop niadtong mga taxi nga wala marehistro.
Matud sa director nga sugod usab karung Lunes ikonsiderar na sa LTFRB-7 nga kolorum kun ilegal ang mga mobiyahe nga taxi kun wala kini sequence number nga gi-imprinta sa kilid nga bahin ug mahimo kining dakpon. - BANAT NEWS