Cebu - Gitinguha ni Mayor Jonas Cortes sa Mandaue City nga tanang pamilya sa dakbayan kahatagan niya og luna nga sarang katukoran og desenting balay.
Kini ang nasayran sa Banat News kang manlalaban Francisco Amit nga maoy officer-in-charge sa Housing Urban and Development Office (HUDO) sa kagamhanan sa maong dakbayan.
Matud pa ni Amit nga nagpanikad karon ang mayor nga kadtong walay klarong balay mahimutang na sa opisyal nga listahan sa mga molupyong hataganan og balay sa kagamhanan.
Miingon si Awit nga gipanglista na nila karon ang mga molupyo sa barangay nga naa sa daplin sa sapa, baybayon ug tanang mga nagpuyo sa peligro nga mga lugar sa dakbayan kay mao kini ang hatagan og unang pagtagad sa gobyerno nga makabaton og yuta ug balay.
Apan ang suliran sa ubang mga eskuwater kay dili gustong mobalhin sa mga relocation site nga ihatag sa kagamhanan tungod kay mahilayo sila sa ilang panginabuhi.
Matud pa niya nga kini ang mga hinungdan nga ang mga molupyo nga ibalhin sa laing lugar sa ilang pagpuyo magdumili ug palabihon pa nilang magpabilin sa ilang way klarong pagpuyo kay sa hatagan sila og luna ug balay sa gobiyerno nga layo sa ilang trabaho.
Miingon si Amit nga bakante kaayo karon ang mga relocation site nga ipanghatag unta sa gobyerno ngadto sa mga kabus ugaling lang dili dawaton sa mga pobre ang maong mga yuta. - Romeo T. Limpangog (BANAT NEWS)