Cebu - Ang konseho sa dakbayan sa Talisay gihangyo sa Department of Labor and Employment (DOLE) nga mopasar og resolusyon aron ma-release na ang P249,000 nga nag-ung-ong alang sa “computerization” nga proyekto sa dakbayan nga gitumong para sa organisasyon sa mga may apan sa panglawas sa siyudad.
Apan ang maong hangyo ni Grace Diaz, chief operation officer sa DOLE, Cebu gikwestiyon ni acting Vice Mayor Alan Bucao kun nganong nagkinahanglan pa og resolusyon nga ang maong salapi gamiton man sa non-government organization (NGO).
Si Diaz mipasabot nga ang Talisay maoy kaabag sa mga proyekto sa DOLE hinungdan nga nagkinahanglan kini og resolusyon ug memorandum of agreement bahin sa unsa mang kuwarta nga ipagawas sa DOLE.
Matud ni Diaz nga isip partner, ang Talisay maoy modumala sa mga proyekto diha sa siyudad nga gigahinan og pundo sa DOLE.
Si Konsehal Sabeniano Abatayo mibutyag nga ang maong salapi maoy gamiton sa pagpamalit og mga ekipo sama sa mga computer.
Ang tumong sa maong proyekto mao ang paghatag og training ngadto sa mga “disabled” o may apan sa panglawas nga makakat-on bahin sa Information Technology (IT) aron sayon rang makatrabaho sa mga call center.
Ang siyudad maoy moabaga sa suweldo og mga IT trainer nga mobansay sa mga disabled.
Gawas sa maong salapi alang sa computerization, ang DOLE gikatakdang mopagawas usab og laing P750,000 alang sa mga proyekto sa grupo sa kababayen-an .
Si Konsehal Shirley Belleza kinsa tsirman sa komitiba sa Kababayen-an, Kabataan ug Pamilya mibutyag nga ang maong salapi nadawat na unta sa federation kun may resolusyon pa ang konseho alang niini. - Brenda D. Batuto (BANAT NEWS)