Cebu - Nabulit sa mga samad sa bala ang lawas sa usa ka drayber sa habal-habal dihang girapido kini pagpusil sa drayber ra gihapon sa habal-habal didto sa sitio Timobo, barangay Cabungahan, dakbayan sa Danao niadtong Sabado sa gabii.
Ang biktima mao si Roberto Mata Villaester, 33, minyo, taga highway Looc, Danao City ug usa ka drayber sa habal-habal, samtang ang suspek, pareho ra usab niyang drayber nga mao si Michael Alvarez, hingkod, nga taga Rizal St., Suba siyudad sa Danao.
Si SPO4 Edgar Gomez sa Danao City Police mibutyag sa Banat News nga ang biktima naghatud og pasahero sa Upper Timobo ug dihang mibalik na siya gi-atangan kini sa suspek ug gipusil sa makadaghang higayon hinungdan nga natusak sa mga samad sa bala ang iyang kalawasan.
Gihatod dayon ang biktima ngadto sa tambalanan apan ang suspetsado nakaikyas ug mao karon ang gipangita sa kapolisan. – BANAT NEWS