Cebu - Nanghunaw ang Kapitolyo kabahin sa reklamo sa mga residente batok sa Cebu Provincial Detention and Rehabilitation Center kun CPDRC nga maoy usa sa hinungdan sa problema sa grabeng baho diha sa barangay Kalunasan ning siyudad sa Sugbu.
Sumala pa ni Capitol consultant on information, Rory Sepulveda nga dili mahitabong manimaho ang mga hugaw sa mga binilanggo sa CPDRC tungod kay dugay nang namuntar ang waste water treatment facility sa naasoy nga bilanggoan.
Iyang gitataw nga dili angayan pa nga apilon sa pag-imbestigar pa sa siyudad ang CPDRC kay gawas nga dugay na ang maong waste water treatment facility gipadayon pa gyud ang pag-upgrade sa maong pasilidad.
Si Sepulveda mipasangil hinuon sa katupad nga bilanggoan nga mao ang Cebu City Jail nga maoy tinubdan sa problema sa baho sa barangay Kalunasan.
Kini gumikan kay nasayod silang hagbay ra nga naghangyo ang warden sa City Jail nga si Supt. Efren Nemeño nga mosumpay lamang sila sa maong waste water treatment facility sa provincial jail
Ang maong hangyo makadaghan nang gibalibaran ni Governor Gwendolyn Garcia gumikan kay gihimo ang maong treatment facility tukma lang sa panginahanglan sa CPDRC. - Chester Abadilla (BANAT NEWS)