Cebu - Moabot sa unom ka mga kawani sa barangay Lorega San Miguel ang napositibo sa paggamit og shabu, atol sa gipahigayong kinalit nga drug test dili palang dugay.
Sama sa gihapon, ang random drug test gipasiugdahan sa Cebu City Office for Substance Abuse Prevention (Cosap) nga mibisto na og pipila ka mga barangay workers nakasakop nasad og laing tiggamitan og drogas nga kawani sa gobiyerno.
Ang chairman sa Cosap nga si Jose Felix Lazarte nasurpresa sa maong gidaghanon tungod kay kini ang labing unang higayon nga niabot sa unom ang napositibo.
“Since sa akong paglingkod sa Cosap niadtong 2004, karon pa ni nahitabo nga niabot sa unom ang napositibo sa drug test,” sumala ni Lazarte.
Ang labaw nga gikasurpresa ni Lazarte tungod kay usa sa unom ka mga adis-adis nga nasakpan usa ka babaye nga sakop sa clean and green sa barangay.
Lakip nga nasurpresa niini mao ang barangay kapitan sa Lorega San Miguel nga si Fritz Herrera kinsa maoy nitakda sa kinalit nga drug test.
Gipasalig ni Herrera nga iyang taktakon ang lima nila ka mga tanod ug ang sakop sa ilang clean and green kung matino sa confirmatory drug test nga kini mga adis-adis.
Gipaabot nga sa sunod semana mogawas ug makuha na ang resulta sa confirmatory drug test nga giduso sa Cosap ngadto sa PNP Crime Laboratory.
Ang Lorega mao na ang ikatulo nga barangay sa siyudad nga gipaubos sa Cosap sa random drug screening test niining buwana. – BANAT NEWS