CEBU - Traysikad drayber nadakpan sa kapolisan sa dakbayan sa Toledo human pasanginling milugos sa iyang pasaherang dalaga niadtong Sabado sa alas 9:30 sa gabii sa barangay Sangi sa nahisgutang dakbayan.
Ang nadakpan nga traysikad driver giila sa kapolisan nga si Sergio Pansacala, 34, residente sa sitio Kinner barangay Sangi kinsa napasakaan og kasong pagpanglugos kagahapong adlawa.
Samtang ang giamong-amongan niini mao ang dalagang 29-anyos nga residente sa nahisgutang barangay ang nakuha gyud sa suspetsado human giti-unag kutsilyo.
Base sa report sa kapolisan sa dakbayan sa Toledo gikatahong nagsakay ang biktima sa traysikad sa suspek gikan sa Proper Poblacion dakbayan sa Toledo ug nagpahatod unta sa sitio Kinner barangay Sangi.
Apan samtang nagsubay sila sa dalan Osmeña kalit lang mihunong ang suspetsado ug gitionan og kutsilyo ang dalaga dayon pugsanong gidala sa kasagbutan ug gilugos.
Human sa hitabo, ang suspetsadong si Sergio daling misibat palayo sa lugar, apan pagka-Domingo sa buntag mi-report sa kapolisan ang dalaga hinungdan sa pagkasikop sa suspetsado.
Kagahapong adlawa napasaka na ang kasong pagpanglugos sa piskaliya sa dakbayan sa Toledo. (BANAT NEWS)