Cebu - Gipaluyohan ni 6th District Representative Nerissa Soon-Ruiz ang pagahimoong random drug test sa mga tinun-an sa mga nagkadaiyang tulunghaan dinhi sa nasud.
Matud pa niya nga ang pagpahigayon og drug test sa mga tulunghaan maoy usa sa mga paagi aron mapakgang ang mga kalihokan sa ginadiling drugas.
Dugang pa niya nga dili angay ikabalaka sa katawhan ang pagpasiugda sa maong kalihokan sanglit ipaagi kini sa usa ka kinalit nga sistema ug ang mga tinun-an nga wala magbisyo sa ilegal nga drugas dili angayang mabalaka ug mahadlok.
Si Soon-Ruiz miingon nga isip usa sa mga principal sponsor sa balaud nga naglambigit sa pagsumpo sa ilegal nga drugas dinhi sa nasud nalipay kaayo siya dihang gimando sa pamuno nasud ang pagpakiggubat batok sa mga tawong nagpalusot niini.
Ang pagpasiugda og random drug test sa mga tinun-an sa nagkadaiyang tulunghaan sa nasud gimando ni Pangulong Gloria Macapagal Arroyo kinsa mao usab ang nangulo sa kampanya sa pagsumpo sa ilegal nga drugas dinhi sa nasud. – BANAT NEWS