CEBU - Pormal nga gitunol kagahapong adlawa ni Gov. Gwendolyn Garcia ngadto kang Sinulog Foundation director Ricky Ballesteros ang P2 milyones nga tseke isip donasyon ngadto sa Sinulog Foundation.
Si Garcia nagkanayon nga ang maong donasyon agi og tabang sa foundation nga naglisod karon tungod sa kalibutanong ekonomikanhong krisis.
Matud pa ni Garcia nga nasayran niya nga minus kaayo ang nihatag og kontribusyon sa foundation karong tuiga kay naglisod usab ang mga dagkong kompanya dinhi sa Sugbu nga maoy sagad mga major contributors sa Sinulog pipila na ka tuig ang nakalabay.
Segun sa gobernadora, may dakong rason siyang motabang sa foundation kay nakahatag man gani ang probinsya og tabang ngadto sa ubang lugar sa Sinulog pa nga usa ka tinuig nga kalihukan nga nakadani na usab og daghang mga turista.
Giangkon sa gobernador nga siya maoy unang nitanyag nga mohatag og P2 milyones sa foundaton dihang naestorya niya si acting mayor Mike Rama niadtong launching sa Sinulog.
Kini dihang nasayran niyang gamay ra ang nahipos nga contribution sa foundation karong tuiga ilabina nga may COA rules nga nagdili sa siyudad sa pagdonar og dakong pundo alang sa foundation.
Ang gobernador nitumbok usab nga dili masango sa COA rules ang pagdonar sa probinsiya sa maong salapi tungod kay walay connection ang probinsiya sa foundation dili sama sa siyudad sa Sugbu kansang chairman mao ang naglingkod nga bise mayor.
Sa iyang bahin, si Ballesteros mapasalamaton kaayo sa donasyon sa probinsiya nga iyang giangkong wala nila damhang ingon niini kadako ang ihatag sa lalawigan kay kaniadto tunga lamang sa milyon ang sagad idonar sa probinsiya.
Dugang pa ni Ballesteros nga dako na kaayo og ikatabang sa foundation ang maong donasyon aron magmalampuson ang Sinulog Mardi Gras taliwala sa ekonomikanhong krisis karon. (BANAT NEWS)