CEBU - Giklaro sa Philippine Atmospheric Geographical and Astronomical Seismological Administration kon PAGASA nga walay bagyo kundili storm surges ra maoy nasinati karon dinhi sa Kabisay-an ug Mindanao kabahin sa haguros sa hanging Amihan.
Gibutyag ni Ella Cumahig, weather forecaster sa PAGASA Mactan dihang nahinabi sa Banat News nga gikan sa 3.7 hangtud sa 5 metros ang gitas-on sa mga bawod sa kadagatan tungod sa kusog nga hangin.
Matud ni Cumahig nga ang hangin may gikusgong 58 ngadto sa 68 kilometros matag takna nga susama sa hanging masinati kun may bagyong signal number 1.
Aron makalikay sa disgrasya ug mapasidan-an ang publiko mipagawas og “gale warning” aron magmatngon ang publiko ilabina kadtong mga namuyo duol sa baybayon nga peligro karung panahona daplin sa baybayon tungod sa kalit pagdagko sa mga bawod.
Gikatahong talagsaon ang gibugnawon ug gikusgon sa hangin karong mga panahona dinhi sa Kabisay-an ug Mindanao gumikan kay kini sagad ra unta nga masinati sa Luzon sa matag bulan sa Nobiyembre hangtud sa Disyembre.
Gipasidan-an ni Cumahig ang publiko ilabina kadtong mga gagmay nga barko ug sakyanan sa kadagatan nga likayan lang una ang pagpataka og lawig sa dagat.(BANAT NEWS)