Cebu - Namatay ang usa ka 36-anyos nga lalaki human kini gitabangan og kulata, gituok ug gibali ang liog sa duha ka mga lalaki nga iyaha ra usab nga kauban sa inom diha sa barangay Lambusan lungsod sa San Remegio niadtong Sabado sa alas 8:00 sa gabii.
Ang biktima mao si Ronnie Banga Villegas, 36,apan dunay kapuyo ug nagpuyo sa nahisgutang lugar.
Samtang ang duha ka mga suspek nga iyaha ra usab nga kauban sa pag-inom og bino mao sila si Jose Villamor Talisic, 31, ug ig-agaw niini nga si Mateo Sinajon Villamor, 46, pulos mga molupyo sa nahisgutang lugar.
Subay sa imbestigasyon sa kapulisan ang biktima ug ang suspek nga si Jose Villamor duna nay daang panagbingkil dihang gigamit sa biktima ang bangka sa suspek nga wala mananghid.
Matud ni PO1 Yuri Colonia sa San Remegio Police dihang nahinabi sa Banat News nga samtang sila nag-inom naugkat ang daan na nilang panagbingkil ug diha-diha gitabangan og kulata sa duha ang biktima.
Atol sa pagkulata gituok kini ug gilubag ang ulo hinungdan sa pagkabali sa liog niini nga gituohang maoy nakapatay kang Villegas.
Ang mga suspek nadakpan usab dayun sa pag-responde nila ni SPO4 Primo Saturnino Duazo Jr., ug gibalhog na karon sa detention cell ug karung buntag gikatakdang pasakaan og kaso.
Matud ni PO1 Colonia nagdumili paghatag og dugang mga pamahayag ang mga suspek atol sa ilang pagsukit-sukit kabahin sa maong krimen. – BANAT NEWS