Cebu - Nagmahay si Chief Supt. Ronald Roderos, directror sa Regional Police Office (RPO) sa pasangil nga iyang gihatagan og abogado si PO3 Ken Yngayo, sakop sa Regional Logistics Division, kinsa nalambigit sa usa ka kasong pagpatay.
Matud pa ni Roderos nga dili makiangayon ang maong pasangil batok kaniya sanglit wala niya idayon ang iyang plano nga hatagan og abogado si PO3 Yngayo human kini hidakpi pipila ka takna human pusila patay ang usa ka negosyante og lechon nga si Methusael Inesola niadtong Desyembre 31, sa niaging tuig diha sa NGA barangay Lahug.
Nasayran nga ang duha ka suspetsado sa pagluthang sa biktima nga sila si Diosdado Ortega ug Jackie Trazona, mga confidential agent sa Regional Anti-Illegal Drugs Special Operations Task Force (RAIDSOTF-7) nadakpan dayon human sa maong krimen ug nakuhaa’g mga armas human kini motago sa panimalay ni PO3 Yngayo.
Didto sa panimalay ni Yngayo nasakmit usab sa kapolisan ang tag-as nga armas nga way lisensya, samtang ang laing suspek nga si Yuli Ramas naka-ikyas.
Gipasabot niya nga ang iyang pagpahibawo sa paghatag og abogado kang PO3 Yngayo niadto lang panahon nga nangayo kini og panabang kaniya human kini dakpa sa mga otoridad.
Sumala pa ni Roderos nga ang iya untang paghatag og abogado gitumong lang agi’g ayuda kang PO3 Yngayo nga makapanalipod dihang wala kini masayod sa iyang pagahimuon.
Hinungdan nga gimanduan gilayon niya ang iyang staff nga si Sr. Supt. Vicente Loot nga pahatagan og abogado si PO3 Yngayo niadtong higayona.
Apan wala kini magpasabot nga sila na ang mogasto niini hangtud na mahuman ang kaso.
Kahinumduman nga napasaka na ang kasong murder ug frustrated murder batok sa mga akusado samtang obstructions of justice/harboring of criminals ingon man illegal possession of firearm ang gipasaka batok kang PO3 Yngayo. – BANAT NEWS