Cebu - Mga piniriso sa Talisay City Jail gikatahong gipangkagid ug uban niini dunay sakit nga tuberculosis, matud ni Konsehal Shirley Belleza, tsirman sa komitiba sa panglawas sa konseho sa dakbayan sa Talisay.
Si Belleza sa pakighinabi niini sa Banat News kagahapon sa hapon mibutyag nga niadtong Disyembre 29, 2008 mipahigayon sila og medical mission diha sa city jail tungod kay aduna siya’y nadawat nga suwat gikan sa piniriso kinsa nangayo kaniya og pagkaon. Ang maong piniriso mitug-an usab kini nga kasagaran sa mga piniriso sa City Jail gipangkagid.
Matud ni Belleza nga uban niya sa maong kalihukan ang mga doktor sa Rural Health Unit (RHU) nga sila si Dr. Ben Pepa, Cesar Bautista ug Glynna Campo.
Lakip usab sa mitabang sa maong medical mission ang mga nurse ug midwife sa mga RHU, mga sakop sa Talisay Swimming and Life Saving Club ug Mercy in Action kinsa nanghatag og mga sinena ngadto sa mga priso.
Gibutyag ni Belleza nga sobra sa 300 ka mga piniriso nga na-check-up ang nasutang dunay mga kagid ug ang uban niini dunay sakit nga TB. Apan gihuwat pa niya ang resulta sa eksaminasyon aron mapiho ang gidaghanon sa dunay TB.
Gitataw niini nga kinahanglan malahi og selda ang nangasakit og TB tungod sa kakuyaw niini nga makatakod ngadto sa mga wala matapti niining maong sakit.
Ang mga nasakit og TB ang ipaubos sa medication diin ang kagamhanan sa dakbayan sa Talisay ang moabaga sa ilang mga tambal.
Si Belleza midugang nga gawas sa medical mission nagdala usab ang iyang grupo og mga pagkaon, sabon ug ointment nga itambal sa mga kagid sa piniriso.
Ang Banat News mitawag kagahapon sa hapon sa city jail aron makuhaan og pamahayag ang jail warden nga si Superintendent Johnson Calub apan ang nakatubag sa tawag sa telepono nga si JO3 Roland Alcomendras nagkanayon nga dili makatubag ang ilang warden tungod kay duna kini giatimang mga bisita nga mga opisyal gikan sa rehiyon. – BANAT NEWS