Cebu - Patay nang napalgan ang usa ka construction worker nga gituohang giunay og puspus og kahoy diha sa ulo sa iyaha ra usab kaubanan sa trabaho kagahapon sa kaadlawon sulod sa construction site nga ilang gitrabahoan sa Golden Meadow Subdivision barangay Gabi lungsod sa Cordova.
Ang biktima mao si Joji Paloma, taga barangay Labangon siyudad sa Sugbo samtang ang suspek mao ra usab ang iyang kaubang construction worker nga si Isagani Caballes alyas Toto, taga PC Hills, Lahug siyudad sa Sugbu.
Matud ni SPO3 Rafael Tiro sa Cordova Police dihang nahinabi sa Banat News nagkuyog ang biktima ug suspek pagbisita sa ilang kauban sa trabaho nga si Gerald Vincent Sitoy sa sitio Camolinas, Poblacion ug nag-inom.
Apan human makabalik sa constrction site nga ilang gitrabahoan nga gipanag-iya sa usa ka Delia Juanir nahitabo na ang pagpamuspos.
Ang mga saksi nga sila si Arnel og Randy Pepiluna mibutyag nga gipuspusan sa suspek ang biktima og kahoy nga lubi nga dunay gidak-on nga 2x3x4 sa agtang hinungdan nga nakuyapan kini ug diretso nga namatay.
Ang gwardiya sa subdivision nialegar sab nga namatikdan nila ang pagpauli sulod sa subdivision sa biktima alas 12:00 sa tungang gabii samtang ang suspek nipauli alas 2:00 sa kaadlawon og pagka alas 3:45 sa kaadlawon nakit-an nila ang suspek nga nagdali nga nigawas sa subdivision ug wala na mobalik. – BANAT NEWS