Cebu - Patay ang usa ka 19-anyos nga lalaki ug naangol usab ang hinigugma niining babaye sa sitio Malibiu sa barangay Subangdaku, dakbayan sa Mandaue sa miaging gabii ug nadakpan usab sa kapolisan ang suspetsado sa follow-up operation.
Ang namatay mao si Fritz Fuentes, taga sitio Ngoloc, barangay Subangdaku sa maong dakbayan ug ang naangol nga hinigugma mao si Maria Jiji Arcenal, 19, dalaga nga taga Purok 3 sa barangay Camputhaw, dakbayan sa Sugbu.
Ang suspetsado nga nadakpan giila nga mao si Joel Bercede, 20, taga Malibu Beach sa barangay Subangdaku sa maong dakbayan ug gituohang sakop sa Alpha Kappa Rho Fraternity.
Si PO2 Ramil Lim sa Homicide Section sa kapolisan sa maong dakbayan nga nahinabi sa Banat News miingon nga naglakaw lang ang mga biktima sa maong dapit ug ang suspetsado nga ilang nasugatan ang kalit lang mipusil niini.
Matud pa ni Lim nga si Fuentes naigo sa dughan ug si Arcenal nga naggakos niya naigo sad sa kamot, patay ng midangat sa Mandaue City District Hospital si Fuentes nga gikarga sa sakyanan sa ABS-CBN News Team nga miabot sa dapit.
Ang team ni Inspector Goerge Aniñon, pinaagi sa guide natultulan ug nailhan ang suspek nga si Bercede nga maoy namusil sa mga biktima.
Si Inspector George Aneñon, hepe sa homicide section sa kapolisan sa maong dakbayan maoy naghimo sa follow up operation nga miresulta usab sa pagkasikop niini.
Ang suspetsado nga gipresentar kang Arcenal sa kapolisan ang positibo usab nga nagtumbok nga maoy namusil kanila ug dali usab nga mipahilayo. – BANAT NEWS