CEBU - Gisulod sa iyang panimalay ug gipauwana’g bala ang usa ka truck driver hinungdan sa hinanali niining kamatayon diha sa may sitio Isla Verde barangay Inayawan ning dakbayan mga alas 8:30 sa miaging gabii.
Ang namatay giila sa kapulisan nga si Gerry Riamello, 53, dunay kapuyo ug nagpuyo sa nahisgutang lugar.
Base sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang biktima gikatahong natulog pa niadtong higayuna dihang gipusil sa duha ka suspetsado.
Ang biktima naabtan nalang kini sa mga polis diha ibabaw sa lantay’ng kawayan nga iyang gihigdaan nga naglunang na sa kaugalingong dugo ug wa nay kinabuhi.
Ang kapuyo sa biktimang si Riamello nga si Abelina Amolo mitug-an sa mga imbestigador sa kapulisan nga gibiyaan niya ang iyang kapuyo nga natulog sulod sa ilang payag uban sa ilang anak babaye.
Kalit lang nga nibutho ang duha ka wala mailhing suspetsado ug ang usa niini iyang nadunggan nga nagkanayon “sudla na,tirahi na” ug diha-diha ang usa sa mga suspetsado nipauwan og mga bala sa biktima.
Ang biktima nakaangkon og mga samad pinusilan sa wala ug tuong ilok, liog, ingon man buko-buko nga maoy nakaingon sa kamatayon niini.
Human sa pagpamusil ang duha ka mga suspetsado yano lang usab kaayong nanglakaw padulong sa sudlonong bahin sa nahisgutang lugar.
Ang kapulisan nakakuha’g usa ka slug sa wala pa matinong armas samtang wala pa usab ma-istablisar kun unsay motibo sa maong pagpamusil. (BANAT NEWS)