CEBU - Duha ka mga batan-on nga babaye ug lalaki nangalumos ug namatay samtang nangaligo og dagat uban sa ilang mga pamilya ug kahigalaan niadtong Sabado sa ala 1:00 sa hapon sa sitio Tawi-Tawi barangay Poblacion lungsod sa Dalaguete.
Si PO3 Cristopher Requina sa Dalaguete Police Station nga gikahinabi sa Banat News miila sa mga biktima nga sila si Brelia Silvestre, 25, dalaga ug Reynante Molina, 19, ulitawo pulos lumolupyo sa barangay Calireojan bukirang lugar sa nahisgutang lungsod.
Matud pa ni PO3 Requina nga sila si Silvestre ug Molina gideklarar nga dead-on-arrival sa mga doktor sa Dr. Ildefonso Alcantara Memorial Hospital sa nahisgutang lungsod.
Sumala pa niini nga ang duha uban sa ilang mga kahigalaan ug kabanay nangaligo sa dagat tungod sa ilang Christmas party sa maong resort apan sa dihang nahuman sila maniudto naka-desider silang mangaligo sa dagat.
Dangtan og pila ka minutos wala na makit-i sa mga kabanay ang duha hinungdan nga ila kining gipangita ug pipila ka minutos ang milabay nakit-an na lang nila ang duha nga nanglutaw ug gituuhang nangalumos hinungdan nga gidali sa pagdala sa tambalanan apan gideklarar nga mga patay na.
Dunay mga hugon-hugon nga delikado gyud ang maong dapit alang sa mangaligoay tungod sa kanunay nang may mamatay sa maong dapit matag tuig ug sumala pa sa tuo-tuo sa mga tawo dunay manuyo og kuha og kinabuhi sa maong resort.
“Daghan na kaayong nangamatay diha sa maong beach kanunay lang gayud nang mamatyan duna man gud kunoy “Okoy” ug “Kugtong” diha sa maong lugar… kantilado usab ang ilawom niini,” sumala pa ni PO3 Requina.
Dugang pa niini nga ang maong kaliguanan nga dagat sa lugar adunay mabaw apan mokalit lang og lawon gumikan kay kantilado, samtang kun magtaob kusog usab kaayo ang sulog sa tubig sa dagat. – BANAT NEWS