Cebu - Nalubaan ang usa ka drayber sa habal-habal dihang gikaaway niini ang kauban ra usab niyang drayber kay nag-ilog sila sa mga pasahero didto sa Sitio Baucan Barangay Sac-on lungsod sa miaging adlaw.
Ang nadunggaban mao si Apolinario Capuyan, 26, minyo, samtang ang suspetsado mao si Joselito Lomen, 26 , minyo nga pulos taga Baucan.
Matud pa sa kapolisan sa Carmen nga ang biktima nakaangkon og upat ka samad dinunggaban sa nagkadaiyang bahin sa lawas.
Samtang ang suspetsado mitahan dayon sa iyang kaugalingon ngadto sa kapolisan.
Sa wala pa ang hitabo, naglalis ug nagkasinumbagay ang duha kay nag-ilog sa mga pasahero didto sa terminal sa Carmen.
Dihang naupsan na sa pailob ang suspetsado milanit kini sa iyang kutsilyo ug gihansakan sa maka-upat ka higayon ang biktima.
Gihatod dayon ngadto sa Danao District Hospital ang biktima, samtang ang suspetsado nagtingkagol na karon sa prisohan sa Carmen Police Station. – BANAT NEWS