Cebu - Hepe sa Philippine Mediation Center (PMC) sa dakbayan sa Talisay nasuko, dihang ang iyang sakop nga gipasanginlang may kalabutan sa nahitabong anomaliya sa pagpaburot sa mga presyo sa hydraulic oil nagpa-interview sa mga sakop sa media.
Si Alvin Ybañez nga job order ug ubos sa quota sa mayor kanhi nadestino diha General Services Office (GSO) sobra sa usa ka tuig.
Si Ybañez kinsa nadestino na karon diha sa (PMC) gipasanginlan nga dunay kalambigitan sa pagpaburot sa mga presyo sa hydraulic oil, apan ang maong mga pasangil ang iyang gihimakak.
Ang grupo sa mga tigbalita mianha sa buhatan sa PMC sa pagkuha og habig ni Ybañez apan kini mihangyo nga adto lang sa gawas sa ilang buhatan magpa-interview.
Si Honeylaine Rizarri, Mediation Staff Officer IV kalit lang migawas sa buhatan ug misita ngadto sa usa ka journalism intern ug nagkanayon “day! unsa na?” ug dihang mitubag ang maong intern nga “interview ni siya mam.”
Si Rizarri mipaila sa iyang kaugalingon nga siya maoy head sa nahisgutang buhatan ug mikuwestiyon kini sa wala pagpananghid sa mga sakop sa media nga interbyuhon si Ybañez.
Tungod sa gihimo ni Rizarri, mitapon ang atensyon sa media ngadto kaniya aron siya ma-interview diha sa iyang buhatan ug aron usab siya pangayoan og despensa apan arogante hinuon kaayo kining mitubag sa media dihang gipangutana siya kun unsay ipasabot sa trabaho sa mediation center.
Kini mitubag sa pag-ingon nga dili siya ganahan motubag niini ug mibahad sa mga tigbalita nga adto mag-abot sa korte kun siya mapatik sa mantalaan pinaagi sa pag-ingon “I’ll see your name in court.” – BANAT NEWS