Cebu - Higpit nga gipatuman sa kabomberohan sa dakbayan sa Mandaue ang pagdili sa pagpataka og baligya sa mga paboto alang sa paglikay sa aksidente sa sunog sa panahon sa Pasko.
Nunot usab sa maong paghigpit sa dili pagpataka og baligya og paboto ilang giila ang usa lamang ka dapit nga himuong pyrotechnic zone sa bakanteng luna sa kilid nga bahin sa Mandaue City Sports and Cultural Complex sa reclamation area sa sitio Tribunal sa barangay Centro.
Si Fire Chief Insp. Oscar Mayol, hepe sa kabomberohan sa maong dakbayan nga nahinabi sa Banat News miingon nga gawas sa maong dapit nga ilang gitugot ang pagbaligya og pabuto wala nay laing gihatag niini.
Gipasabot ni Mayol nga ang gihatagan og pagtugot sa pagbaligya og paboto sa ilang buhatan mao lamang kadtong nakakuha og permiso gikan sa ilang buhatan.
Matud pa niya nga kadtong mobaligya nga walay permiso nga gihatag gikan sa ilang buhatan paga-isipon nga ilegal ug mahimo kining pagasakmiton sa kapolisan.
Si Mayol miingon nga adunay duha ka dagkong tigbaligya og mga pabuto sa dakbayan nga ilang gihatagan og pagtugot sa pagbaligya sa gawas na sa kilid sa sports complex.
Ang duha ka mga dagkong dealer sa mga pabuto ang ilang gihatagan og pagtugot sa pagbaligya sa Park Mall ug Makro sa reclamation area. – BANAT NEWS