Cebu - Puwerting lisanga sa mga molupyo sa sitio Galaxy, barangay Tangke, Talisay City niadtong Martes sa gabii dihang usa ka tawong hubog nanghagis ug nagwarawara sa iyang pinuti.
Ang suspetsado giila sa mga polis nga si Vicente “Titing” Toregoza, hingkod, nga taga Galaxy.
Si SPO3 Joel Wenceslao, PO2 Allan Villazurda ug PO1 Martin Gorosin maoy midis-arma sa maong tawo kinsa giingong mao gyuy bisyo niini kun malasbag.
Ang mga otoridad nagkanayon nga gibawian dayon nila sa pinuti si Toregoza human madawat ang report gikan sa mga silingan niini ug nahadlok nga kini makatigbas.
Hinuon gumikan sa kasong concealing of deadly weapon gibalhog dayon sa mabugnaw nga prisohan sa Talisay ang maong hubog ug didto na kini mahuwasi sa kalasbag sulod sa bilanggoan. – BANAT NEWS