Inahan, anak gitigbas sa kapuyo

Usa ka amahan ang miunay og tigbas sa iyang kapuyo ingon man anak niini diha sa sitio Banica Barangay Lugo, Borbon niadtong miaging adlaw.

Ang mga biktima giilang sila si Angela dela Cerna, 56, ug anak nga lalaki si Christopher dela Cerna, 23, samtang ang suspetsado mao si Benjamin Ylagan, 52, mga residente sa maong lugar.

Miresponde ang kapolisan sa Borbon nga gipanguluhan ni SPO2 Eugene Allegro, PO3 Elpedio Mahumot ug PO1 Roy Hortelano human makadawat og text gikan sa kapitan sa maong lugar nga nagpahibalo bahin sa insidente.

Sa imbestigasyon sa kapolisan nasutang ang anak nga babaye sa biktima nakadungog kini og saba sa lawak sa iyang inahan ug sa suspek.

Dihang gisusi sa anak nga babaye ang lawak nakugang nalang kini nga nagkadugo na ang inahan samtang nagkupot ang suspek og sundang.

Dali kining nangayo’g tabang maong miadto si Christopher apan giapil kini og tigbas sa suspek diha sa tiyan.

Boluntaryo hinuon mitahan ang suspek ngadto sa kapolisan sumala pang PO3 Edgar Novabos nga gihinabi sa Banat News.

Gikatahong nasagmuyo ang suspek sa kapuyo gumikan sa di na maayong pagtagad niini kaniya.

Kasamtangan nagpaalim sa Vicente Sotto Memorial Hospital ang manag-inahan.

Show comments