CEBU - Gipatas-an og kapin sa usa ka bilyon ka pesos ang takdang kolektahunon sa Bureau of Customs (BOC) sa Cebu Port District sa tuig 2009.
Matud pa ni Cebu Customs District Collector Ricardo Belmonte nga nakurat siya dihang gisultihan siya ni BOC Commissioner Napoleon "Boy" Morales atol sa ilang panagkita didto sa Manila sa miaging semana.
Matud pa ni Belmonte nga himoon nang P6 bilyones ang ilang collection target karong sunod tuig segun sa mando sa komisyoner.
Isip usa ka matinumanong disipulo, si Belmonte mipasalig nga iya kining tumanon ug paninguhaon niya kutob sa iyang mahimo nga makab-ot ang maong koleksyon.
Nasayran nga P5 bilyones ray target collection sa BOC Cebu ning tuiga ug kini nakuha na, matud ni Belmonte.
Busa aron matuman ang gilauman sa ilang labaw, si Belmonte nagkanayon nga iya nang giawhag ang iyang mga sakop nga doblehon ang ilang paningkamot aron nga dili sila mapakyas sa ilang tinguha.
Gibutyag ni Belmonte nga niining tuiga P254 bilyones ang gi-target sa BOC nga kolektahunon sa tibuok nasud, samtang P317 bilyones para sa 2009.
Samtang gipahalipayan ni Belmonte ang tanang kawani ug opisyal sa BOC Cebu, Sub-Port of Mactan, BOC-MEPZ ug BOC Dumaguete sa ilang paningkamot nga makab-ot ang ilang target ning tuiga ug gani misobra pa sila og P420 milyones. (BANAT NEWS)