CEBU - Naalarma usab si Cebu City Acting Mayor Michael Rama sa pagdeklarar og bank holiday sa pipila ka mga bangko sa Sugbu.
Kini bisan pa man kun usa lang ka bangko sa dakbayan ang gikatahong lakip sa nanira tungod sa nasinati niining problema.
Nabalaka ang acting mayor sa mamahimo unyang epekto niini, tungod kay niadto pang Huwebesmaningog ang tagdumala sa nanira nga mga bangko.
Subay niini nakigtigom si Rama sa mga sakop sa Cebu Bankers Club, ingon man sa mga representante sa Central Bank of the Philippines ug sa ubang stakeholders.
Gisugyot ni Rama nga mobutang og information center ang hingtungdang mga bangko aron maoy motubag sa pangutana ilabi na sa mga kliyente niini.
Kini sama sa gihimo sa kagamhanan sa dakbayan human malunod ang M/V Princess of the Stars sa Sulpicio Lines niadtong miaging Hunyo.
Gipadayag sa acting mayor nga angayang pugson sa Central Bank ang tag-iya ug tagdumala sa maong mga bangko sa pagbutang og information center.
Gani miboluntaryo pa ang acting mayor nga siya andam motabang sa hingtungdang mga bangko kung dili niini mahimo ang pag-atubang sa publiko.
Ang Central Bank giingong padayon pa nga nagsusi sa maong hitabo ug wala pa matapos ang gipahigayon niining imbistigasyon.
Dunay gipagawas nga pamahayag ang apektadong mga bangko nga sila nanira tungod usab sa kusog nga withdrawal niining panahuna.
Apan wala matino kung kini subli ba nga mobukas sa mosunod nga mga adlaw ug mauli ang kwarta sa mga depositors niini.
Gipasaligan hinoon si Rama sa kapunongan sa mga bangko sa Sugbu nga walay angayang kabalak-an ang publiko sa maong hitabo.
Kini tungod kay gawas sa nag-bank holiday nga mga bangko, giingong lig-on ang pundasyon sa mga bangko sa siyudad. – BANAT NEWS