CEBU - Mikabat sa 8 mil ka board feet nga mga coco lumber ang gitugyan sa Philippine Coconut Authority (PCA-7) ngadto sa kagamhanan sa dakbayan sa Sugbu kagahapon.
Ang mga coco lumber nga giingong gikan sa siyudad sa Ozamis nasakmit sa Regional Intelligence and Investigation Division (RIID) sa Police Regional Office (PRO-7) didto sa Mandaue City niadtong Nobiyembre 20.
Ang 20 footer van nga gikargahan sa mga coco lumber gitugyan gilayon sa RIID ngadto sa PCA-7 human kini masakmit ug dihang walay tag-iyang miangkon sa nahisgutang mga kahoy, gihatag na lang kini ngadto sa City government.
Ang mga coco lumber iapod-apod sa kagamhanan sa dakbayan ngadto sa mga biktima sa sunog diha sa barangay Basak San Nicolas agig pagsanong sa hangyo sa taga Department of Social Welfareand Development (DSWD)7.
Kahinumdoman nga mikapin sa 120 ka pamilya ang naapektahan sa nahisgutang sunog nga miigo sa tulo ka sitio sa maong barangay pipila ka semana lang ang nakalabay.
Sa iyang bahin, dako ang pasalamat ni kapitan George Rama sa Basak San Nicolashuman masayod sa maong kalambuan.
Nagtoo ang kapitan nga pinaagi sa maong mga housing materials, mahibalik sa naandan ang mga pinuy-anan sa mga fire victim. – BANAT NEWS