CEBU – Laing mga insular prisoners sa Cebu City Jail ang gitakdang ipadala sugod niining semanaha ngadto sa New Bilibid Prisons sa Muntinlupa.
Kini maoy gipahibawo ni City Jail Warden Superintendent Efren Nemenio subay usab sa ilang kampanya pagpaluag sa bilanggoan.
Apan sukwahi sa naandan nga barko maoy pasakyan sa mga piniriso, eroplano karon maoy nahuna-hunaan ni Nemenio nga pasakyan sa mga binilanggo.
Gipasabot ni Nemenio nga walay available nga barko nga kasakyan sa mga inmates hinungdan nga sila mapugos niini pagpasakay sa eroplano.
“Ang barko sa Gothong gibaradero man, ang Superferry nibalibad kay peak season, unya ang Sulpicio wa pa man tuguting mubiyahe ilang passenger ship,” sumala ni Nemenio.
Matud sa jail warden nga labing minos 20 ka mga insular prisoners ang ilang gitakdang ihatod ngadto sa Muntinlupa sugod ugmang adlawa o Biyernes.
“Naa na man tay arrangement ana sa eroplano, pero tagduha lang ka inmates per flight ilang gitugot nato,” dugang pamahayag ni Nemenio.
Gitataw sa jail warden nga ang pagpasakay og binilanggo sa eroplano dili maoy unang higayon tungod kay kini giingong ila nang gihimo kaniadto.
Nakahinumdum si Nemenio nga sila duna nay gihatod nga piniriso ngadto sa Palawan ug Davao nga gipasakay usab og eroplano.
Kasagaran sa mga insular prisoners nga gitakdang ihatod ngadto sa New Bilibid Prisons giingong mga konbiktado sa kasong may kalabutan sa ginadiling drugas.
Ang Cebu City Jail sa kasamtangan dunay 2,070 ka mga inmates diin 204 niini ang mga insular prisoner nga gipaabot usab nga ipadala ngadto sa Muntinlupa.
Nagkanayon si Nemenio nga ang gahin alang sa pamasahe sa nahisgutang mga binilanggo mao na lay ilang gipaabot aron kini mahatod na sa kaulohan.
Ang mga insular prisoners mao kadtong mga piniriso nga nasintensyahan sa hukmanan og labing minos unom ka tuig nga pagkabilanggo. – BANAT NEWS