CEBU – Gituohang naigo sa saag nga bala ang usa ka mag-uuma nga nakaangkon og samad pinusilan sa iyang tiyan samtang nagkaon kini sa panihapon sulod sa ilang kusina didto sa Sityo Tal-ot barangay Valencia siyudad sa Carcar niadtong Martes sa alas 6:00 sa gabii.
Ang biktima nga nagpabilin pa karon sulod sa tambalanan mao si Primitivo Pantilgan, 41, ulitawo, usa ka mag-uuma ug molupyo sa nahisgutang lugar.
Si SPO1 Joel Pananganan sa Carcar City Police Station mibutyag sa Banat News nga ang biktima nagkaon sulod sa ilang balay kauban sa iyang mga ginikanan ug mga igsoon dihang nakadungog sila og buto sa armas.
Paglabay sa pipila ka mga gutlo mao nalay namatikdan nila nga nalup-og sa salog ang biktima ug nagkadugo ang tiyan niini hinungdan nga gidali nila og hatod ngadto sa Carcar District Hospital
Didto nasuta nga nasamdan gyud sa bala sa wala hibaw-ing kalibre ang tiyan sa biktima.
Apan gumikan sa kakuwang sa kahimanan sa tambalanan sa Carcar gibalhin ang biktima ngadto sa tambalanan sa dakbayan sa Sugbu aron kini malibre.
Gituohan sa kapolisan nga ang bala nga nakaigo sa biktima gikan sa usa ka tawo nga walay lingaw ug nagpasalba lang sa iyang hinagiban bisan walay kontra. – BANAT NEWS