Nagpabiling wala pa mailhi ang usa ka mananagat nga gituohang nalumos ug namatay samtang nanagat kini didto sa kadagatan sa barangay Daanlungsod, lungsod sa Medillen kagahapon sa alas 7:00 sa buntag.
Ang biktima nasigpatan sa duha ka mga mananagat nga naglutaw -lutaw busa ila dayon kining gisumbong ngadto sa mga sakop sa Bantay Dagat.
Si SPO1 Roland Reyes sa Medillen Police Station mibutyag sa Banat News nga hangtod kagahapon sa udto wala pa gyuy mga tagtungod nga miila niini.
Ang biktima gihulagway nga nagsul-ob og itom nga senina nga dunay tatak sa atubangan nga Levis, nag-short og kolor brown, itomon ang pamanit, adunay patik sa walang abaga nga kasing kasing ug laing patik sa tuong abaga nga giporma og mga sundalo sa Egypt ug gibana banang nagpangidaron og 60 anyos.
Ang mga kapolisan nagtuo nga giatake sa altapresyon ang biktima ug nahulog sa pumpboat ug nalumos patay kay walay nakatabang kaniya.
Gani ang mga mananagat nga unang nakadiskobre sa biktima nga sila si Eduardo Dispacio, 51, minyo, ug Roselio Sinanggoti, 47, minyo, ug molupyo sa maong lugar nagkanayon nga nakit-an nila ang biktima nga gi-anod na ug naglutaw -lutaw sa gilay-ong 100 metros gikan sa pumpboat niini nga may ngalang Saint Ignacios.