Gihulagway sa pipila ka regular nga mga empleyado sa Cebu City Hall nga palpak ang ilang bag-o nga Electronic kon E-Card.
Kini tungod kay naguba ang kahimanan nga gidala sa mga kawani sa Land Bank of the Philippines atol sa pagsugod niini og pagpanghatag sa E-Card kagahapong adlawa.
Gani pipila ka mga City Hall employees ang nagbagolbol tungod sa kalangay nga nahatag niini kanila nga miresulta usab sa kalangay sa ilang dinalian nga trabaho.
Giklaro hinoon sa labaw sa Management Information Computerization System (MICS), Engineer William Artajo, nga gamay lang nga kakulian ang nahitabo.
Ang E-Card maoy gihulip sa karaang mga ATM Card sa mga kawani sa City Hall aron kini dili na maprenda ngadto sa mga tigpatanto.
Kini tungod kay ang E-Card mao usab unya ang magsilbing Identification (ID) Card sa mga empleyado ug maoy gamiton pagtamla sa ilang daily time record.
Niadtong miaging semana, ubay-ubay sa mga kawani sa City Hall ang nangreklamo human usab pangan-a ang ilang mga ATM Card sa ATM machine.
Wala masayod ang nahisgutang mga empleyado nga gi-deactivate na sa Land Bank ang ilang mga ATM Card samtang gi-process niini ang ilang E-Card.
Nasayran nga ang mga ATM Card sa 1, 300 ka regular employees sa City Hall maoy unang gi-process sa maong bangko ug giilisan og E-Card.
Matod ni Artajo nga posibling unya pa sa sunod tuig mailisan og E-Card ang mga ATM Card sa mga casual ug contractual nga mga empleyado.
Ang City Hall dunay kapin sa 4,000 ka mga kawani nga naglakip na sa mga regular, casual ug contractual employees.