CEBU - Patay ang usa ka construction timekeeper nga gipusil patay sa iyang bayaw nga polis gumikan sa giingong panagbangi nilang duha kaniadto ug ang pagtawag kaniya sa polis og bayot.
Ang insidente nahitabo diha sa usa ka tindahan atbang sa Cebu South Bus Terminal sa dalan N. Bacalso sa barangay Sambag 1 diin madestino ang suspek nga si PO1 Jose Dennis Malazarte, 41, minyo, nadestino sa Provincial Headquarters Security Group, CPPO ug taga Junquera Extention, barangay San Antonio ning dakbayan.
Ang gipatay sa maong polis mao si Beinvenido Vargas Alfornon, 36, nga nagpuyo sa nahisgutang barangay kinsa namatay diha-diha human makaangkon og samad pinusilan sa iyang walang dughan, liog, ug duha ka samad pinusilan sa buko-buko.
Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police gikataho nga ang biktimang si Alfornon nag-inom sa Demy Fabian’s Store atbang sa South Bus Terminal uban sa iyang mga higala.
Ang suspetsado gikatahong miduol kanila ug milingkod usab dili layo sa ilang nahimutangan ug miinom usab og beer.
Pipila ka minutos ang milabay mibiya ang mga kauban sa biktima ug diha na giduol sa suspek ang biktima ug matud pa sa mga saksi nagka-estoryahay pa silang duha.
Matud pa sa mga saksi nadunggan nila ang suspek nga miingon og “ayaw pag-garagara dinhi kay imoha ning lugar.” Ug giingong gitubag kini sa biktima og “talawan ka, bayot ka.”
Diha-diha gipusil sa suspetsadong police ang iyang bayaw makadaghang higayon ginamit ang .38 revolver niini hinungdan sa hinanaling kamatayon sa biktima.
Nakuha diha sa posesyon sa suspek atol sa pagtahan niini ang maong armas nga may upat ka mga kabhang, uban sa duha ka mga buhing bala ug laing 12 ka mga buhing bala sa .38 revolver nga diha sa iyang holster.
Human sa pagpamusil boluntaryong nitahan si Malazarte ngadto sa miresponding sila si PO2 Remus Goco sa Mobile Patrol Group diha sa crime scene.
Si PO1 Malazarte nga gikahinabi sa mga tigbalita diha sa karsel sa CCPO nipadayag nga wala siya magmahay nga iyang nabuhat sa bayaw ug mas maayo kun ma-priso siya aron dili na makasala pa.
Giangkon niini nga dugay na silang nagkabangi sa iyang bayaw gumikan sa ilang personal nga problema dihang nagtipon pa sila’g mga panimalay kaniadto.
Si Malazarte onse na ka tuig sa serbisyo sa PNP. – BANAT NEWS