Nagmadaugon ang mga sidewalk vendors diha sa dalan M.C. Briones ning dakbayan sa Sugbu ug makabalik na sa ilang pwesto diha sa maong dapit.
Ang mga manindahay nga sakop sa Cebu Market Vendors Development Cooperative (Cemvedco) gitakda nang mobukas sa ilang mga stalls karong adlawa.
Kini human usab molugak ang mga opisyal sa barangay Santo Niño sa ilang hugot nga pagbabag sa tinguha sa mga vendors.
Matud sa chairman sa Cemvedco nga si Erwin Goc-ong nga mahuman na karong adlawa ang ilang gipatukod nga mga estraktura alang sa dul-an sa 40 ka mga vendors.
Subling gipadayag ni Goc-ong nga temporaryo lang ang pagpahiluna sa mga manindahay diha sa maong dapit hangtud nga subling matukod ang unit 2 sa Carbon Public Market.
Sa iyang bahin, dismayado usab si Santo Niño barangay captain Pancho Ramirez Sr., tungod sa pag-insister ni Goc-ong ug sa giingong pag-interbiner ni acting Mayor Michael Rama.
Tungod niini nanghunaw na ang kapitan sa pagpabarog og mga estraktura sa mga vendors bisan kung kini gihulagway ni Ramirez nga illegal.
Gipadayag hinuon ni Goc-ong nga dili tablahon sa iyang mga sakop ang mga opisyal sa Santo Niño tungod kay kini giingong mohatag og matag adlaw nga arkabala sa barangay.
Gani niingon si Goc-ong nga sa nangaging katuigan mokita ang barangay Santo Niño ug kapin sa P120 mil matag tuig nga arkabala gikan sa nahisgutang mga vendors.
Apan gitataw ni Ramirez nga dili na sila mokolekta og arkabala, tungod kay duna nay resolusyon ang barangay nga nagdili sa mga vendors pagpaninda diha sa dalan M.C. Briones.