CEBU - Ipasusi ni Apas barangay captain Ramil Ayuman ang posibilidad nga tinuyo ang nahitabong sunog nga niugdaw sa tulo ka panimalay ug duha nadanyos diha sa sitio Upper San Miguel barangay Apas kagahapon sa buntag.
Matud ni Ayuman mi-request na ngadto niya ang mga molupyo sa maong lugar sa milabay’ng semana nga pabutangan og tanod ang ilang lugar tungod sa kabalakang ipasunog ang maong lugar.
Si Ayuman dihang nahinabi sa Banat News miingon nga gibaharan na ang residente kutob karung bulan sa Marso ug demolison kini kun magmagahi pagpahawa.
Giingong may desisyon na sa Court of Appeals sa kaso sa maong luna nga nag-ila sa pamilyang Godinez nga maoy tag-iya niini nga mao karon ang gipuy-an sa di momenus 150 ka pamilya.
Mikabat sa P700 mil ang danyos matud pang SFO2 Felix Romero nga nahinabi sa Banat News ug nakontrolar kini sulod sa 18-minutos human madawat ang alarma 9:53 sa buntag ug giisa ngadto sa 2nd alarm.
Walay naangol o nakalas sa hitabo ug kasamtangang gipahiluna sa sikbit nga basketball court ang mga nabiktima samtang gisusi usab ang report nga Christmas lights ang nakaingon sa sunog. (Darrel Carumba ug Guam Logroño) (BANAT NEWS)