CEBU - Kapin sa usa ka gatus ka bags sa dugo ang gidonar sa kapin usa ka gatos ka mga tinun-an sa labing unang blood letting activity sa Philippine State College of Aeronautics kon PHILSCA Campus uban sa Philippine National Red Cross kon PNRC sud sa Mactan Benito Ebuen Air Base sa dakbayan sa Lapulapu kagahapon.
Ang maong kalihukan nagdala sa tema nga "Dugong PHILSCANIAN Karugtong ng Buhay Mo" diin target sa PNRC makakuha og 100 ka tinun-ang donors.
Matud pa ni Engr. Roxel Basunillo ang Head sa Office of the Student Affairs sa maong tunghaan nga nakita nila ang benepisyo nga makatabang ang ilang tunghaan sa mga nanginahanglan maong wala magmakuli si Dr. Nonadel Alvarado Soriano ang Campus Director sa pagtugot sa suwat-hangyo sa PNRC.
Gihulagway ni Basunillo nga oportunidad sa mga tinun-an nga makadonar sa ilang dugo ug ingon man mahatagan og card nga sa panahon silay manginahanglan og dugo makakuha sila dayon niini nga libre.
Si Dr. Amour Cielo Cantillas ang Blood Center Manager sa PNRC miingon nga miagi ang mga applicant donors og physical examination, blood typing ug pagsusi kung sila anemic.
Ang Student Supreme Council president nga si Crimson Flores maoy usa sa misuporta niini. (BANAT NEWS)