CEBU - Mikunhod og halos katunga ang krimen nga nahitabo sa Talisay karong tuiga itandi sa miaging tuig.
Matud pa ni Senior Inspector Jovito Canlapan nga gikan sa buwan sa Enero hangtod sa Nobiyembre ning tuiga, 16 lang ang kasong murder; 35 sa homicide; 130 ang physical injury; rape, 9; robbery, 100; ug theft, 130.
Sa susamang gidugayon sa miaging tuig 2007, may 26 ka kasong murder; 33 sa homicide; 141 sa physical injury; rape 12; 165 sa robbery; ug 240 sa theft.
Matud pa ni Canlapan nga kasagaran sa maong mga kaso napasaka na ngadto sa korte.
Hinuon bisna misiaw ning tuiga ang tulis pinaagi sa mga tulisang de motor, apan gumikan sa paningkamot sa kapolisan nga masanta ang maong mga krimen, mihinay ra gihapon kini matud pa ni Canlapan.
Gawas niini may mga insidente usab sa pusil kinsa kasagaran sa mga kriminal nga mohimo niini magsakay usab og motorsiklo.
Matud pa ni Canlapan nga usa sa nakapaluya sa mga tulisang de motor mao ang walay bugto nga check point operation nga gipahigayon matag karon ug unya.
Si Canlapan kinsa kanhi acting police chief sa Talisay City miingon nga gumikan sa ilang mga check point operation, ubay-ubay na nga motorsiklo nga kuwang sa papeles ang na-impound ug gipaabot nga ma-claim kini sa mga tag-iya pinaagi sa pagbayad sa tukmang multa. – BANAT NEWS