CEBU - Duha ka mga kalihukan ang ipahigayon ug ilusad karong adlawa diha sa dalan Colon ning dakbayan sa Sugbu.
Usa niini mao ang paghandom sa ika-145 nga kasumaran sa adlaw’ng natawhan ni Andres Bonifacio diin ipahigayon usab ang Heroes Walk.
Sa maong pagpanglakaw si Acting Mayor Michael Rama maoy modala sa papel ni Miguel Lopez de Legaspi ug si Konsehal Arsenio Pacaña maoy Pigafetta.
Samtang si Konsehal Yayoy Alcoseba maoy modala sa papel ni Ferdinand Magellan samtang si Enrique, ang interpreter ni Magellan maoy papelan ni Konsehal Edwin Jagmoc.
Ang mga sakop sa Cebu City Unified Force maoy modala usab sa papel sa mga katipuneros nga nangita og kagawasan gikan sa mga Katsila.
Gitakdang magsugod ang nahisgutang kalihukan karong alas 4:30 sa hapon diha sa eskina sa mga dalan Mabini ug Colon.
Human niini isunod usab dayon ang usa ka programa nga magbanhaw sa kagahapon sa dalan Colon ingon man ang Bahug-Bahug sa Colon.
Sa pikas bahin, ilusad usab karong hapon ang ikatulo na ka tuig nga Kasadya sa Downtown Colon (Pasko sa Colon).
Tumong niini mao ang pagbuhi sa kadasig ug kasadya sa nahisgutang dapit nga mag-emphasize sa cultural significance ug historical value niini.
Kini pinaagi usab sa pagbutang og dugang mga suga sa dalan, ug pagtaud sa Christmas lights ug Christmas decors sa mga establisamento ug uban pa.
Sa susamang kalambuan, ugmang adlawa na usab ilusad diha sa Fuente Osmeña ang usa ka buwan nga Pasko sa Sugbu.
Pasigahon na ugma sa gabii ang higanteng Christmas tree diha sa Fuente Osmeña dungan sa fireworks display.
Gawas sa matag gabii nga kalingawan sugod ugmang adlawa diha sa Fuente Osmeña, ang Pasko sa Sugbu duna say mga indigay.
Kini sama sa Lantern ug Christmas decoration contests sa nagkadaiyang barangay hall ug mga establisamento sa dakbayan. - BANAT NEWS