CEBU - Pamilya sa polis nga namatay niadtong Miyerkules atol sa scout training sa Sibonga wala magdahom sa gidangatan niini apan wala matahap nga dunay foul play ang maong hitabo.
Si Jerson Sanopao, 27 manghud ni PO1 Junrey Sanopao sa pakighinabi niini sa Banat News nagkanayon nga wala siya magtuong mao kini dangatan sa iyang maguwang.
Matud niini base sa resulta sa eksaminasyon sa doktor sa iyang maguwang heat stroke ug over fatigue ang hinungdan nga nawad-an kini sa panimuot nga miresulta na sa iyang kamatayon.
Sa upat ka managsuon si PO1 Sanopao maoy kinamaguwangan ug gihulagway nilang usa ka maayong igsoon ug higala.
Si Sanopao gradwado sa Electronic Communication Engineering sa University of Cebu kinsa niadto pang high school pa kini nangandoy nang mahimong polis.
Gani makaupat kini ka higayon nga mi-apply ug mikuha sa pasulit sa National Police Commission una pa kini makapasar.
Human sa iyang Basic Training diha sa Regional Training School nadestino si Sanopao sa Mandaue City Police Office ug sa Cebu City Police Office pagtapos sa iyang Field Training Program (FTP).
Human sa duha ka tuig nga pagka- FTP niadtong Nobiyembre 16, 2008 gipadala sila ngadto sa Regional Mobile Group (RMG) sa Camp Ceperino Genovia sa lungsod sa Sibonga alang sa iyang training sa scouting. - BANAT NEWS