CEBU - Naputos sa samad pinusilan ang lawas sa usa ka mag-uuma dihang napalgan sa iyang mga silingan diha sa iyang umahan human kini pusila sa wala mailhing mamumuno alas 8:00 sa buntag sa miaging adlaw diha sa sitio Sayaw, barangay Taptap ning dakbayan.
Ang biktima nga si Joseph Leyson, 32, nagpuyo sa nahisgutang lugar nakaangkon og daghang samad pinusilan nga gituohang agi sa shotgun ug carbine rifle gikan sa tulo ka mga lalaki.
Sa imbestigasyon nila ni SPO4 Alex Dacua ug mga kaubanan sa Homicide Section gikatahong sayong niadto sa iyang umahan nga gitamnan og mga buwak si Leyson nianang adlawa.
Apan samtang nag-atiman sa mga pananom kalit nga mibutho ang tulo ka mga armadong tawo ug sa way daghang pangutana gipauwanan kini og mga bala.
Ang kapulisan wala pa makatumbok kun unsay motibo sa maong pagpamusil kun may kalambigitan ba kini sa bangi sa yuta o kaha personal nga rason.
Sumala pa sa mga silingan nakadungog nalang sila og nagsunod-sunod nga sipang buto sa armas gikan sa maong dapit hinungdan nga gidali nila kini’g adto apan nakurat nalang sila nga naligo na sa kaugalingong dugo ang biktima ug wala nay kinabuhi.
Gikatahong may mga mag-uumang nakakita sa tulo ka mga armadong lalaki nga nagdali og ikyas sa dapit apan wala na maabti sa mirespondeng mga polis.
Sa gihimong pagsiksik diha sa dapit may nakuhang usa ka kabhang sa .45 kalibreng bala; usa ka kabhang sa shotgun ug duha ka kabhang sa .30 caliber Carbine Rifle. Uban sa report ni Lesley Caminade (BANAT NEWS)